寫hō͘學生朋友ê代誌
文／陳雷 錄音／邱碧華 2020-11-17 民報
我ê某叫做阿Tiⁿ，看–起-來20 thóng歲。路–裡看 tio̍h我 hn̄g-hn̄g tō 閃，m̄ kap我講話。 我想伊m̄愛hō͘人知影我是伊 ê 翁。查某gín-á惜面皮驚見笑 ê 關係。 In tau ê人mā仝款， 講伊iáu-bōe做–人。 In規家攏真顧謙。不過大家攏知影我是伊ê翁。賣魚ê菊–a bat kā我講：「忠—a，阿Tiⁿ 講伊iáu未做–人。」我kā伊說明，阿 Tiⁿ驚見笑，pháiⁿ勢講。我有去媽祖宮抽籤，mā是講 “天生注定。” In攏知影–lah…。Ah無，菊–a thài-ē當面kā我講 ：「無彩一个好翁…..。」M̄是講我是teh講啥人？害隔壁賣肉ê阿肥笑kah歪腰。In攏知影–lah….。
M̄-kú見ùi in tau門口過，看tio̍h我tō走入去bih。你看有人chiah pì-sù？有一項我bē啥瞭解，伊kap別人攏 bē生份，人人好，有講有笑….。 Ôa！hit个笑，文文 á 笑…..。花心ê tiⁿ蜜親像伊ê名。人人看–tio̍h，bē輸蜂phīⁿ tio̍h蜜，òⁿ-òⁿ叫，擋bē-tiâu飛óa–去。
今á日tī菜市á遇–tio̍h，ná行ná捷捷oa̍t 頭過–來 kā我看。Tn̂g頭鬃，白衫白裙chhap紅花，抹胭脂。Ôa！hit對目睭，愛koh驚，驚koh愛，lú行lú緊..……。我真知，伊ê心內，驚ê後面cha̍h-tio̍h愛，愛ê頭前tō是驚。伊ê心肝 tah底見真是對我有心，查某gín-á pháiⁿ勢表示 。今á日伊知影我ē去菜市á，刁工裝 súi-súi，頭一擺抹胭脂hō͘我看。伊ê心意我thài-ē m̄知？Ôa！hit對目睭…. cha̍h tī後面, 看 bē tio̍h–ê tō是愛。有一工伊ē知影我外好，無tàng koh chhōe–a。媽祖婆講 「天生注定」，菊–a mā講「無彩一个好翁…..。」
今á日，菊–a kā我講：「阿tiⁿ beh 嫁–人-a。」 In母–a市á買大魚大肉，in tau辦喜事。 終其尾–來…..終其尾–來….我早 tō講–a，媽祖婆mā講「天生注定」….. 緊來去準備，…剪頭鬃，se-bí-loh，新皮鞋….我kā菊–a吩咐，一定來hō͘我kap阿Tiⁿ請。菊—a、阿肥笑kah歪腰，規个菜市á攏teh笑…..「 M̄是你–lah！…. M̄是你–lah！…..」
台灣字（白話字）版
Góa ê bó͘ kiò-chò A-Tiⁿ, khòaⁿ–khí-lâi jī-cha̍p thóng hòe. Lō͘–nih khòaⁿ-tio̍h góa hn̄g-hn̄g tō siám, m̄ kap góa kóng-ōe. Góa siūⁿ i m̄-ài hō͘ lâng chai-iáⁿ góa sī i ê ang. Cha-bó͘ gín-á sioh bīn-phôe kiaⁿ-kiàn-siàu ê koan-hē. In tau ê lâng mā kâng-khoán, kóng i iáu-bōe chò–lâng. In kui-ke lóng chin kò͘-khiam. Put-kò tāi-ke lóng chai-iáⁿ, góa sī i ê ang. Bē-hî ê Kiok–a bat kā góa kóng,” Tiong–a, A-Tiⁿ kóng i iáu-bōe chò–lâng.” Góa kā i soat-bêng, “A-Tiⁿ kiaⁿ-kiàn-siàu, pháiⁿ-sè kóng. Góa ū khì má-chó͘-keng thiu-chhiam, mā-sī kóng “thian-seng chù-tiāⁿ.” In lóng chai-iáⁿ–lah….Ah-bô, Kiok–a thài-ē tng-bīn kā góa kóng, “Bô-chhái chit-ê hó-ang….” M̄-sī kóng góa sī teh kóng siáⁿ-lâng? Hāi keh-piah bē-bah ê A-Pûi chhiò kah oai-io. In lóng chai-iáⁿ–lah….
M̄-kú kiàn ùi in-tau mn̂g-kháu kòe, khòaⁿ-tio̍h góa tō cháu khì bih. Lí khòaⁿ ū-lâng chiah pì-sù? Ū chi̍t-hāng góa bē siáⁿ liáu-kái, i kap pa̍t-lâng lóng bē seⁿ-hūn, lâng-lâng hó, ū kóng ū chhiò….Ôa！hit ê chhiò, bûn-bûn-á chhiò, ….hoe-sim ê tiⁿ-bi̍t chhin-chhiūⁿ i ê miâ. Lâng-lâng khòaⁿ–tio̍h, bē-su phang phīⁿ-tio̍h bi̍t, òⁿ-òⁿ kiò, tòng-bē-tiâu poe óa–khì.
Kin-á-ji̍t tī chhài-chhī-á gū–tio̍h, ná kiâⁿ ná chia̍p-chia̍p oa̍t-thâu kòe–lâi kā góa khòaⁿ. Tn̂g thâu-chang, pe̍h-saⁿ pe̍h-kûn chhap âng-hoe, boah ian-chi. Ôa！hit-tùi ba̍k-chiu, ài koh kiaⁿ, kiaⁿ koh ài, lú kiâⁿ lú kín…..Góa chin-chai, i ê sim-lāi, kiaⁿ ê āu-bīn cha̍h-tio̍h ài, ài ê thâu-chêng tō-sī kiaⁿ. I ê sim-koaⁿ tah-té kìⁿ-chin sī tùi góa ū-sim, cha-bó͘ gín-á pháiⁿ-sè piáu-sī. Kin-á-ji̍t i chai-iáⁿ góa ē khì chhài-chhī á, tiau-kang chng súi-súi, thâu-chi̍t-pái boah ian-chi hō͘ góa khòaⁿ. I ê sim-ì góa thài-ē m̄-chai？Ôa！hit tùi ba̍k-chiu….cha̍h tī āu-bīn, khòaⁿ bē-tio̍h–ê tō-sī ài. Ū-chi̍t-kang i ē chai-iáⁿ góa gōa-hó, bô-tàng koh chhōe–a. Má-chó͘-pô kóng ‘thian-seng chù-tiāⁿ’. Kiok–a mā kóng ‘bô-chhái chi̍t-ê hó-ang……
Kin-á-ji̍t, Kiok–a kā góa kóng, A-Tiⁿ beh kè–lâng-a. In bú-a chhī-á bé tōa-hî tōa-bah, in tau pān hí-sū. Chiong-kî-bé–lâi…..chiong-kî-bóe–lâi….góa chá tō kóng–a, Má-chó͘-pô mā kóng, “thian-seng chù-tiāⁿ…..” Kín-lâi-khì chún-pī…..chián thâu-chang, se-bí-loh, sin phôe-ê…..Góa kā Kiok–a hoan-hù, it-tēng lâi hō͘ góa kap A-Tiⁿ chhiáⁿ. Kiok–a, A-Pûi chhiò kah oai-io. Kui-ê chhài-chhī á lóng teh chhiò…..「 M̄-sī lí–lah！……M̄-sī lí–lah！….」
（Chok-chiá chù：chhiáⁿ-iōng pe̍h-ōe-jī）（作者注：請用白話字）
讀hōo你聽：
